ನುಗ್ಗೇಹಳ್ಳಿಯ ಸದಾಶಿವ ದೇವಾಲಯ

ಹಾಸನ ಜಿಲ್ಲೆ ಚನ್ನರಾಯಪಟ್ಟಣಕ್ಕೆ 20 ಕಿಲೋ ಮೀಟರ್ ದೂರದಲ್ಲಿರುವ ಪಟ್ಟಣವೇ ನುಗ್ಗೇಹಳ್ಳಿ. ಶಿಲ್ಪಕಲೆಯ ತವರೆಂದೇ ಖ್ಯಾತವಾದ ಹಾಸನ ಜಿಲ್ಲೆಯಲ್ಲಿರುವ ಇಲ್ಲಿ ಇರುವ ಎರಡು ಭವ್ಯ ದೇವಾಲಯಗಳಲ್ಲಿ ಸದಾಶಿವ ದೇವಾಲಯವೂ ಒಂದು.

ಹೊಯ್ಸಳರ ಶೈಲಿಯ ಈ ದೇವಾಲಯ ಇದೇ ಊರಿನಲ್ಲಿರುವ ಲಕ್ಷ್ಮೀನರಸಿಂಹ ದೇವಾಲಯದಷ್ಟು ಕಲಾ ಶ್ರೀಮಂತಿಕೆಯಿಂದ ಕೂಡಿಲ್ಲ.

ಏಕ ಕೂಟವಾದ ಈ ದೇವಾಲಯದಲ್ಲಿ ಸಹ ಸುಂದರ ಗೋಪುರ, ಮುಖಮಂಟಪ, ಸುಖನಾಸಿ, ಗರ್ಭಗೃಹವಿದೆ. ಪ್ರಧಾನ ಗರ್ಭಗೃಹದಲ್ಲಿ ಸದಾಶಿವನ ಲಿಂಗವಿದೆ. ನಕ್ಷತ್ರಾಕಾರದ ಜಗತಿಯ ಮೇಲೆ ಬಳಪದಕಲ್ಲುಗಳಿಂದ ಕಟ್ಟಲಾದ ಈ ಸುಂದರ ದೇವಾಲಯದ ಹೊರಭಿತ್ತಿಯ ಪಟ್ಟಿಕೆಗಳಲ್ಲಿ ಅರೆ ಕಂಬಗಳ ಹೊರತಾಗಿ ಸೂಕ್ಷ್ಮ ಕೆತ್ತನೆಗಳಿಲ್ಲದಿದ್ದರೂ, ಅರೆ ಗೋಪುರಗಳಿಂದ ಕೂಡಿದ ಗೋಪುರ ವಿಶಿಷ್ಟವಾದ್ದಾಗಿದೆ. ನವರಂಗದ ಭುವನೇಶ್ವರಿಗಳಲ್ಲಿರುವ ಕಲಾತ್ಮಕತೆ ಮನಸೆಳೆಯುತ್ತದೆ.