ಮುಖಪುಟ /ನಮ್ಮದೇವಾಲಯಗಳು  

ಬ್ರಹ್ಮ ಪ್ರತಿಷ್ಠಾಪಿತ ಕಾಳಹಸ್ತೀಶ್ವರ ಕ್ಷೇತ್ರ

ಸರ್ಪದೋಷ ನಿವಾರಣೆಯಾಗುವ ಪುಣ್ಯ ತಾಣ

Kalahasti, Kalahastiswara, Andrapradesh, Kannadaratna.com, our temples.in * ಟಿ.ಎಂ.ಸತೀಶ್

ಏಳು ಮಲೆಯೊಡೆಯ ತಿರುಪತಿ ತಿಮ್ಮಪ್ಪ ನೆಲೆಸಿಹ ತಿರುಪತಿಗೆ ಅತಿ ಸನಿಹದಲ್ಲೇ ಇರುವ ಪವಿತ್ರ ಪುಣ್ಯಕ್ಷೇತ್ರ ಕಾಳಹಸ್ತಿ. ಕಾಳಹಸ್ತಿ ಆಂಧ್ರಪ್ರದೇಶದ ಚಿತ್ತೂರು ಜಿಲ್ಲೆಯಲ್ಲಿರುವ ಶೈವ ಕ್ಷೇತ್ರ. ತಿರುಪತಿ ಭೂ ವೈಕುಂಠ ಎಂದು ಖ್ಯಾತಿ ಪಡೆದಿದ್ದರೆ, ಸುವರ್ಣಮುಖಿ ನದೀ ತೀರದಲ್ಲಿರುವ ಕಾಳಹಸ್ತಿ ದಕ್ಷಿಣ ಕೈಲಾಸವೆಂದೇ ಪ್ರಖ್ಯಾತಿ ಪಡೆದಿದೆ.

ಇಲ್ಲಿ ಅತ್ಯಂತ ಪ್ರಾಚೀನವಾದ ಶ್ರೀ. ಕಾಳ ಹಸ್ತೀಶ್ವರ ಹಾಗೂ ಜ್ಞಾನ ಪ್ರಸನ್ನಾಂಬಿಕೆ ದೇವಾಲಯಗಳಿವೆ. ಪಲ್ಲವಚೋಳ ಮತ್ತು ವಿಜಯನಗರದ ಅರಸರ ಕಾಲದಲ್ಲಿ ಈ ದೇವಾಲಯವನ್ನು ವಿವಿಧ ಹಂತದಲ್ಲಿ ಅಭಿವೃದ್ಧಿ ಪಡಿಸಲಾಗಿದೆ ಎಂಬುದು ಶಾಸನಗಳಿಂದ ಹಾಗೂ ಇತಿಹಾಸದ ದಾಖಲೆಗಳಿಂದ ತಿಳಿದುಬರುತ್ತದೆ.

ಸ್ಥಳ ಪುರಾಣದ ರೀತ್ಯ ಇಲ್ಲಿನ ಪ್ರಧಾನ ಗರ್ಭ ಗೃಹದಲ್ಲಿರುವ ಶ್ರೀ ಕಾಳಹಸ್ತೀಶ್ವರ ಲಿಂಗವನ್ನು ಸೃಷ್ಟಿಕರ್ತನೂ ತ್ರಿಮೂರ್ತಿಗಳಲ್ಲಿ ಒಬ್ಬನೂ ಆದ ಸಾಕ್ಷಾತ್ ಬ್ರಹ್ಮದೇವರೇ ಪ್ರತಿಷ್ಠಾಪಿಸಿ, ಪೂಜಿಸಿದ್ದಂತೆ. 

ಈ ಕ್ಷೇತ್ರಕ್ಕೆ ಶ್ರೀ ಕಾಳ ಹಸ್ತೀ ಎಂದು ಹೆಸರು ಬರಲು ಕಾಣವೇನು ಎಂಬುದಕ್ಕೂ ಸ್ಥಳಪುರಾಣದಲ್ಲಿ ಒಂದು ಜನಜನಿತ ಕಥೆ ಇದೆ. ಬಹಳ ಹಿಂದೆ, ಶ್ರೀ ಎಂಬ ಹೆಸರಿನ ಜೇಡರ ಹುಳುವೊಂದು ಗರ್ಭಗೃಹದಲ್ಲಿರುವ ಬ್ರಹ್ಮ ಪ್ರತಿಷ್ಠಾಪಿತ ಶಿವಲಿಂಗದ ಸುತ್ತಲೂ ಲಿಂಗಾಕಾರದ ಬಲೆ ಹೆಣೆದು ತನ್ನದೇ ರೀತಿಯಲ್ಲಿ ಸೇವೆ ಸಲ್ಲಿಸಿ ಭಕ್ತಿ ಸಮರ್ಪಿಸಿತ್ತಂತೆ.  ಕಾಳ ಎಂಬ ಸರ್ಪವೊಂದು ಇಲ್ಲಿರುವ ಶಿವ ಲಿಂಗದ ಮೇಲೆ ತನ್ನ ನಾಗರತ್ನಗಳನ್ನೇ ಇಟ್ಟು ಪೂಜಿಸಿತ್ತಂತೆ. ಹಸ್ತಿ ಅರ್ಥಾತ್ ಆನೆಯೊಂದು ತನ್ನ ಸೊಂಡಿಲಲ್ಲಿ ಪವಿತ್ರ ಸುವರ್ಣಾಮುಖಿ ನದಿಯ ನೀರು ತಂದು ಶಿವಲಿಂಗಕ್ಕೆ ಅಭಿಷೇಕ ಮಾಡಿತಂತೆ. ಹೀಗಾಗೇ ಬ್ರಹ್ಮ ಪ್ರತಿಷ್ಠಾಪಿತವಾದ ಈ ಲಿಂಗವನ್ನು ಶ್ರೀ ಎಂಬ ಜೇಡ, ಕಾಳ ಎಂಬ ಸರ್ಪ ಹಾಗೂ ಹಸ್ತೀ ಎಂಬ ಆನೆ ಪೂಜಿಸಿದ್ದರಿಂದ ಇಲ್ಲಿರುವ ಲಿಂಗವು ಶ್ರೀ ಕಾಳಹಸ್ತೀಶ್ವರನೆಂದು ಖ್ಯಾತವಾದರೆ, ಶ್ರೀ ಕಾಳಹಸ್ತೀಶ್ವರ ಸ್ವಾಮಿ ಇರುವ ಊರು ಕಾಳಹಸ್ತಿ ಆಯಿತು ಎಂದು ಹೇಳಲಾಗುತ್ತದೆ.

Kalahasti, Kalahastiswara, Andrapradesh, Kannadaratna.com, our temples.in ಮತ್ತೊಂದು ಕಥೆಯ ರೀತ್ಯ ಶಿವಭಕ್ತನಾದ  ಬೇಡರ ಕಣ್ಣಪ್ಪ ಶ್ರೀ ಕಾಳಹಸ್ತೀಶ್ವರನ ಪರಮಭಕ್ತನಾಗಿದ್ದನಂತೆ. ಆತ ತಾನು ಕೊಂದ ಪ್ರಾಣಿಗಳ ಹಸಿ ಮಾಂಸವನ್ನು ತಂದು ದೇವರಿಗೆ ನೈವೇದ್ಯ ಮಾಡುತ್ತಿದ್ದನಂತೆ. ಬಾಯಲ್ಲಿ ನದಿ ನೀರನ್ನು ತುಂಬಿಕೊಂಡು ಬಂದು ತಂದು ಶಿವಲಿಂಗಕ್ಕೆ ಅಭಿಷೇಕ ಮಾಡುತ್ತಿದ್ದನಂತೆ. ಶಿವನಿಗೆ ಹಸಿ ಮಾಂಸ, ಎಂಜಲು ನೀರು ಹಾಕಿ ಪೂಜಿಸಿದರು ಶಿವ ಕಣ್ಣಪ್ಪನ ಭಕ್ತಿಗೆ ಒಲಿದನಂತೆ. ಅಂದರೆ ಶಿವ ಭಕ್ತ ಪರಾಧೀನ, ಭಕ್ತರ ನಿಷ್ಕಲ್ಮಶವಾದ ಭಕ್ತಿಗೆ ಒಲಿಯುತ್ತಾನೆ. ಅವನಿಗೆ ಮೇಲು, ಕೀಳು, ಬಡವ, ಬಲ್ಲಿದ ಎಂಬುದು ಯಾವುದೂ ಇಲ್ಲ ಎಂಬುದನ್ನು ಈ ಕಥೆ ಸಾರುತ್ತದೆ.

ತನ್ನ ಭಕ್ತನಾದ ಕಣ್ಣಪ್ಪನನ್ನು ಪರೀಕ್ಷಿಸಲು ಒಮ್ಮೆ ಪರಶಿವ ತನ್ನ ಲಿಂಗದಲ್ಲಿದ್ದ ಕಣ್ಣುಗಳಿಂದ ರಕ್ತ ಬರುವಂತೆ ಮಾಡಿದನಂತೆ. ಇದನ್ನು ಕಂಡ ಕಣ್ಣಪ್ಪ ತನ್ನ ಕಣ್ಣನ್ನೇ ಕಿತ್ತು ಶಿವನಿಗೆ ಅರ್ಪಿಸಿದನಂತೆ. ಇದು ಪಾಮರನಾದ ಭಕ್ತ ಕಣ್ಣಪ್ಪನ ಭಕ್ತಿಯ ಪರಾಕಾಷ್ಠೆಗೆ ಸಾಕ್ಷಿಯಾಗಿದ್ದು, ಇದಕ್ಕೆ ಪುಷ್ಟಿ ನೀಡುವಂತೆ ದೇವಾಲಯದಲ್ಲಿ ಇಂದಿಗೂ ಕಣ್ಣಪ್ಪನ ವಿಗ್ರಹವೊಂದಿದೆ.

Kalahasti, Kalahastiswara, Andrapradesh, Kannadaratna.com, our temples.in ಕಾಳಹಸ್ತಿಯ ಸ್ಥಳ ಮಹಾತ್ಮೆ  ಅರಿತು ಆದಿ ಶಂಕರಾಚಾರ್ಯರು ಇಲ್ಲಿಗೆ ಆಗಮಿಸಿ ಶಿವಪೂಜೆ ಮಾಡಿದರೆಂದೂ ಹೇಳಲಾಗುತ್ತದೆ. ಬೃಹತ್ ಪ್ರಾಕಾರದ ಈ ದೇವಾಲಯ ಐದು ಅಂತಸ್ತುಗಳ ದ್ವಾರಬಂಧ ಗೋಪುರವನ್ನು ಒಳಗೊಂಡಿದೆ.  ಇಲ್ಲಿ ಸರ್ಪದೋಷ ನಿವಾರಣೆಗಾಗಿ ಕೇತು ಪೂಜೆ ಮಾಡಿಸುತ್ತಾರೆ. ದೇವಾಲಯದಲ್ಲಿ ನಿತ್ಯವೂ ಪೂಜೆಗಳು ನಡೆಯುತ್ತವೆ. ಇಲ್ಲಿ ಬಂದು ಪೂಜೆ ಮಾಡಿಸಿದರೆ ಕಾಲಸರ್ಪದೋಷ ನಿವಾರಣೆ ಆಗುತ್ತದೆ ಎಂಬ ನಂಬಿಕೆ ಇದೆ.

ಚೋಳರ ಕಾಲದಲ್ಲಿ ಕಾಳಹಸ್ತಿ ಪ್ರಸಿದ್ಧವಾದ ಯಾತ್ರಾಸ್ಥಳವಾಗಿತ್ತೆಂದು ಶಾಸನಗಳಿಂದ ತಿಳಿದು ಬರುತ್ತದೆ. ಒಂದನೆಯ ಕುಲೋತ್ತುಂಗ ಚೋಳ ಶಿವಾಲಯವನ್ನು ವಿಸ್ತಾರಗೊಳಿಸಿದನೆಂದು ತಿಳಿದುಬರುತ್ತದೆ. ಭವ್ಯವಾದ ಗೋಪುರವಿರುವ ಈ ದೇವಾಲಯದ ಪ್ರವೇಶದಲ್ಲೇ ಓಂ ನಮಃ ಶಿವಾಯ ಎಂಬ  ಫಲಕ ಗಮನ ಸೆಳೆಯುತ್ತದೆ. ಬೃಹತ್ ಪ್ರಾಕಾರವಿರುವ ದೇವಾಲಯದಲ್ಲಿ ದಕ್ಷಿಣಾಮೂರ್ತಿ,  ಜ್ಞಾನ ಪ್ರಸನ್ನಾಂಬಿಕೆ, ಸುಬ್ರಹ್ಮಣ್ಯ, ಪಾತಾಳ ವಿಘ್ನೇಶ್ವರ ಮೊದಲಾದ ದೇವರುಗಳ ಗುಡಿಗಳಿವೆ. ಸರ್ಪದೋಷ ಪರಿಹಾರಾರ್ಥ ಇಲ್ಲಿ ಭಕ್ತರು ಪೂಜೆ ಸಲ್ಲಿಸುತ್ತಾರೆ.

ಮುಖಪುಟ /ನಮ್ಮದೇವಾಲಯಗಳು