ಬೆಂಗಳೂರಿನ ಇಸ್ಕಾನ್ ದೇವಾಲಯ
ಭಾಗವತ
ಪುರಾಣ ಮತ್ತು ಭಗವದ್ಗೀತೆಗಳ ಬೋಧನೆಗಳನ್ನು ಅನುಸರಿಸುವ ಭಕ್ತಿ ಪರಂಪರೆಯನ್ನು
ಹೊಂದಿರುವ ಗೌಡೀಯ ವೈಷ್ಣವ ಪಂಥದ ಧಾರ್ಮಿಕ ಸಂಘಟನೆ ಇಸ್ಕಾನ್. ಅಂತಾರಾಷ್ಟ್ರೀಯ
ಕೃಷ್ಣಪ್ರಜ್ಞಾ ಸಂಘ 15ನೇ ಶತಮಾನದ ಮಹಾನ್ ಸಂತ ಶ್ರೀ ಚೈತನ್ಯ ಮಹಾಪ್ರಭು ಅವರ
ಧೀಶಕ್ತಿಯಿಂದ ರೂಪುಗೊಂಡ ಸಂಸ್ಥೆ.
ಇಸ್ಕಾನ್ ದೇಶದ ವಿವಿಧೆಡೆ ಸುಂದರ ದೇವಾಲಯಗಳನ್ನು ನಿರ್ಮಿಸಿದೆ. ಇವುಗಳ ಪೈಕಿ ಮನೋಹರವಾದ ಕೃಷ್ಣ ದೇವಾಲಯ ಬೆಂಗಳೂರಿನ ರಾಜಾಜಿನಗರ ಹಾಗೂ ಮಹಾಲಕ್ಷ್ಮೀ ಬಡಾವಣೆಯ ಬಳಿಯ ಪಶ್ಚಿಮ ಕಾರ್ಡ್ ರೋಡ್ ನಲ್ಲಿದೆ.
ಬೆಂಗಳೂರಿಗೆ
ಬರುವ ಪ್ರವಾಸಿಗರಿಗೆ ಆಕರ್ಷಣೆಯ ತಾಣವಾಗಿ, ಪುಣ್ಯಕ್ಷೇತ್ರವಾಗಿರುವ ಈ ದೇವಾಲಯ
ಎತ್ತರವಾದ ಬೆಟ್ಟ ಹರೆಕೃಷ್ಣ ಗಿರಿಯ ಮೇಲಿದ್ದು, ನಾಲ್ಕೂ ದಿಕ್ಕಿಗೆ ನಾಲ್ಕು
ಗೋಪುರಗಳನ್ನು ಒಳಗೊಂಡ ಸುಂದರ ರಚನೆಯಿಂದ ಮನಸೂರೆಗೊಳ್ಳುತ್ತದೆ. ಗೋಪುರಗಳ ನಡುವಿನ
ನೀಲಿ ಬಣ್ಣದ ಗಾಜುಗಳು ದೇವಾಲಯದ ಅಂದವನ್ನು ನೂರ್ಮಡಿಗೊಳಿಸಿವೆ.
ಪ್ರತಿನಿತ್ಯ ದೇಶ-ವಿದೇಶಗಳ ಸಾವಿರಾರು ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿರುವ ಇಸ್ಕಾನ್ ದೇವಾಲಯವು ಆಧುನಿಕ ಮತ್ತು ದಕ್ಷಿಣ ಭಾರತದ ಪಾರಂಪರಿಕ ದೇವಾಲಯ ವಾಸ್ತು ವಿಧಾನಗಳು ಹದವಾದ ಮಿಶ್ರಣವಾಗಿದ್ದು, ದೇವಾಲಯವು ಉದ್ದನೆಯ ಗೋಪುರಗಳು, ಬಂಗಾರದ ದೀಪದಗೊಂಚಲು, ಸೂಕ್ಷ್ಮ ಕೆತ್ತನೆಯ ಮರಮುಟ್ಟುಗಳು ಮತ್ತು ವಿಶೇಷ ರೀತಿಯ ಶಿಲ್ಪಗಳಿಂದ ಕೂಡಿರುವ ಈ ದೇವಾಲಯ ಲೋಕರ್ಪಣೆಗೊಂಡಿದ್ದು 1997ರಲ್ಲಿ. ದೇವಾಲಯದ ಮುಖ್ಯ ಒಳಾಂಗಣದಲ್ಲಿರುವ ದೊಡ್ಡ ಬಂಗಾರದ ದೀಪದ ಗೊಂಚಲು ತಿರುವು ಮುರುವಾದ ಕಮಲದ ಆಕೃತಿಯಲ್ಲಿದ್ದು, ತನ್ನ ಸೂಕ್ಷ್ಮ ಕಲಾಕೃತಿಯಿಂದ ನೋಡುಗರ ಕಣ್ಮನ ಸೆಳೆಯುತ್ತದೆ.
ಆವರಣದ
ಮಧ್ಯದಲ್ಲಿ ಹಸಿರಿನಿಂದ ಕಂಗೊಳಿಸುವ ಕೈತೋಟ,
ಕಾರಂಜಿಗಳಿದ್ದು ದೇವಾಲಯಕ್ಕೆ
ಪ್ರಶಾಂತತೆಯನ್ನು ತಂದುಕೊಟ್ಟಿವೆ. ದೇವಾಲಯದ ಒಳಗೆ ಶ್ರೀ ಪ್ರಹ್ಲಾದ ನರಸಿಂಹ,
ಶ್ರೀ ಶ್ರೀನಿವಾಸ
ಗೋವಿಂದ,
ಶ್ರೀರಾಧಾಕೃಷ್ಣಚಂದ್ರ,
ಶ್ರೀಕೃಷ್ಣಬಲರಾಮ
ಮತ್ತು ಶ್ರೀ ನಿತಾಯ್ ಗೌರಾಂಗರ ಮೂರ್ತಿಗಳಿವೆ.
ರಾತ್ರಿಯ ವೇಳೆ ವಿದ್ಯುತ್ ದೀಪಗಳ ಬೆಳಕಲ್ಲಿ ಝಗಮಗಿಸುವ ದೇವಾಲಯವನ್ನು ನೋಡುವುದೇ ಒಂದು ಸೊಬಗು.
ದೇವಾಲಯದಲ್ಲಿ 17 ಮೀಟರ್ ಎತ್ತರ ಅಂದರೆ 56 ಅಡಿಯ ಬಂಗಾರದ ಕವಚವಿರುವ ಧ್ವಜಸ್ತಂಭವಿದೆ. 28 ಅಡಿಯ ಬಂಗಾರ ಲೇಪಿತ ಕಳಶಗಳೂ ಇವೆ.
ಇಸ್ಕಾನ್ ದೇಗುಲದಲ್ಲಿ ಭಕ್ತರ ಅನುಕೂಲಕ್ಕಾಗಿ ಶುದ್ಧ ಕುಡಿಯುವ ನೀರು, ಸ್ವಚ್ಛವಾದ ಶೌಚಾಲಯ, ವೃದ್ಧರು ಮತ್ತು ಅಂಗವಿಕಲರ ನೆರವಿಗಾಗಿ ಲಿಫ್ಟ್ ಸೌಲಭ್ಯ, ವಾಹನ ನಿಲುಗಡೆಗೆ ವಿಶಾಲವಾದ ಸ್ಥಳವಿದ್ದು, ಮೂಲ ಸೌಕರ್ಯಗಳಿಂದಲೂ ಶ್ರೀಮಂತವಾಗಿದೆ.
ಇಸ್ಕಾನ್
ದೇಗುಲದಲ್ಲಿ ಪ್ರಮುಖ ಹಿಂದೂ ಉತ್ಸವಗಳನ್ನು ವೈದಿಕ ಪದ್ಧತಿಯ ಪ್ರಕಾರ
ನಡೆಸಲಾಗುತ್ತದೆ. ಶ್ರೀರಾಮನವಮಿ,
ಅಕ್ಷಯ ತೃತೀಯ,
ಗೋವರ್ಧನ ಪೂಜೆ,
ಬ್ರಹ್ಮೋತ್ಸವ,
ನರಸಿಂಹ ಜಯಂತಿ,
ಕೃಷ್ಣ ಜನ್ಮಾಷ್ಟಮಿ,
ದೀಪೋತ್ಸವ,
ವೈಕುಂಠ ಏಕಾದಶಿ,
ಗೌರ ಪೂರ್ಣಿಮೆ,
ಮೊದಲಾದ ಉತ್ಸವಗಳು
ಇಸ್ಕಾನ್ ನಲ್ಲಿ ನಡೆಯುತ್ತವೆ.
ವಾರ್ಷಿಕ ರಥಯಾತ್ರೆ, 12 ದಿನಗಳ ಕಾಲ ನಡೆಯುವ ಬ್ರಹ್ಮೋತ್ಸವ ನೋಡಲೇ ಬೇಕಾದ ಉತ್ಸವ ಎಂದರೆ ತಪ್ಪಾಗಲಾರದು. ಪ್ರತಿ ನಿತ್ಯ ದೇವಾಲಯದಲ್ಲಿ ಶುಚಿಯಾದ ರುಚಿಯಾದ ಪ್ರಸಾದ ನೀಡಲಾಗುತ್ತದೆ.
ದೇವಾಲಯ ಪ್ರತಿ ಮುಂಜಾನೆ 4-15ರಿಂದ 5-00, 7-15ರಿಂದ 12-50 ಮತ್ತು ಮಧ್ಯಾಹ್ನ 4:೦೦ರಿಂದ ರಾತ್ರಿ 8-20 ರವರೆಗೆ ಸಾರ್ವಜನಿಕರ ದರ್ಶನಕ್ಕೆ ತೆರೆದಿರುತ್ತದೆ.