ಮುಖಪುಟ /ನಮ್ಮದೇವಾಲಯಗಳು   

ಗುರುವಾಯೂರ್ ಅಪ್ಪನ್ ದೇವಾಲಯ

ವಾಯು ದೇವ ಪ್ರತಿಷ್ಠಾಪಿಸಿದ ಕೇರಳದಲ್ಲಿರುವ ಪುಣ್ಯಕ್ಷೇತ್ರ

*ಟಿ.ಎಂ.ಸತೀಶ್

ಗುರುವಾಯೂರ್ ಅಪ್ಪನ್, guruvaryurappa, ಗುರುವಾಯೂರು, ಕೇರಳ, ವಾಯ್ ನಾಡ್, ಸೇಲಂ, ತ್ರಿಸೂರ್, Guruvayur temple, srikrishna, vayu, bruhaspati, temples of India,ಕೇರಳದ ಚೌಫಾಟ್ ತಾಲ್ಲೂಕಿನಲ್ಲಿರುವ ಪರಮ ಪವಿತ್ರವಾದ ಶ್ರೀಕೃಷ್ಣ ಕ್ಷೇತ್ರ ಗುರುವಾಯೂರು. ವೈಷ್ಣವರ ಪ್ರಸಿದ್ಧ ಯಾತ್ರಾ ಸ್ಥಳವಾದ ಈ ಪುಣ್ಯಭೂಮಿಯಲ್ಲಿ ಕೃಷ್ಣ ದರ್ಶನ ಮಾಡಿದರೆ ಜನ್ಮ ಪಾವನವಾಗತ್ತದೆ, ರೋಗ ರುಜಿನಗಳು ಪರಿಹಾರವಾಗುತ್ತವೆ ಎಂಬುದು ಭಕ್ತರ ನಂಬಿಕೆ.

ಎಂಟನೇ ಶತಮಾನದವರೆಗೆ ಗುರುವಾಯೂರಿಗೆ ಕುರುವಾಯೂರು ಎಂದು ಕರೆಯಲಾಗುತ್ತಿತ್ತಂತೆ. ಮೇಲ ಪೂಂತೂರ್ ಸಂತರು ಇದನ್ನು ಗುರುವಾಯೂರು ಎಂದು ಕರೆದರೆಂದು ಆಗಿನಿಂದ ಈ ಊರು ಗುರುವಾಯೂರು ಎಂದು ಖ್ಯಾತವಾಯಿತು ಎಂದು ಕೆಲವರು ಹೇಳುತ್ತಾರೆ.

ಆದರೆ ನಾರದ ಸ್ಥಳ ಪುರಾಣ ಹೇಳುವುದೇ ಬೇರೆ. ಪುರಾಣದಲ್ಲಿ ಗುರುವಾಯೂರ್ ಅಪ್ಪನ್ ಮಹಿಮೆ ತಿಳಿಯುತ್ತದಂತೆ. ಪರೀಕ್ಷಿತ ಮಹಾರಾಜನ ಪುತ್ರ ಜನಮೇಜಯ ತನ್ನ ತಂದೆಯ ಸಾವಿಗೆ ಕಾರಣನಾದ ತಕ್ಷಕನ ಮೇಲೆ ಕೋಪಗೊಂಡು ಇಡೀ ಸರ್ಪಕುಲದ ಮೇಲೆ ಸೇಡು ತೀರಿಸಿಕೊಳ್ಳಲು ಸರ್ಪಯಾಗವನ್ನೇ ಮಾಡಿ ಎಲ್ಲ ಸರ್ಪಗಳನ್ನೂ ಆಹುತಿ ಪಡೆದನಂತೆ. ಸರ್ಪದೋಷದಿಂದಾಗಿ ಜನಮೇಜಯನಿಗೆ ಭಯಂಕರ ಕುಷ್ಠರೋಗ ಬಂದಿತಂತೆ. ಆಗ ಆತ್ರೇಯ ಮಹಾಮುನಿಗಳು ಜನಮೇಜಯನಿಗೆ ಶ್ರೀಕೃಷ್ಣ ಪ್ರಸನ್ನನಾಗುವಂತೆ ಮಾಡಲು, ಆತನ ಕಷ್ಟ ದೂರಮಾಡಲು, ಗುರುವಾಯೂರು ಮಹಿಮೆ ತಿಳಿಸಿದರಂತೆ.

ಗುರುವಾಯೂರ್ ಅಪ್ಪನ್, guruvaryurappa, ಗುರುವಾಯೂರು, ಕೇರಳ, ವಾಯ್ ನಾಡ್, ಸೇಲಂ, ತ್ರಿಸೂರ್, Guruvayur temple, srikrishna, vayu, bruhaspati, temples of India,ವಸುದೇವ ದೇವಕಿಯರ ಎಂಟನೇ ಮಗುವಾಗಿ ಹುಟ್ಟಿ, ಕಂಸ, ಚಾಣೂರಾದಿ ರಾಕ್ಷಸರನ್ನು ಕೊಂದ ಶ್ರೀಕೃಷ್ಣ ದ್ವಾರಕೆಯಲ್ಲಿ ತನ್ನದೇ ಪ್ರತಿರೂಪವನ್ನು  ಸ್ಥಾಪಿಸಿದನಂತೆ. ಯದುವಂಶ ನಾಶವಾಗಿ, ದ್ವಾರಕೆಯು ಪ್ರಳಯ ಕಾಲದಲ್ಲಿ ಸಮುದ್ರದಲ್ಲಿ ಮುಳುಗುತ್ತಿದ್ದಾಗ, ಈ ವಿಗ್ರಹವನ್ನು ರಕ್ಷಿಸುವಂತೆ ಬೃಹಸ್ಪತಿಗೆ ತಿಳಿಸುವಂತೆ ಕೃಷ್ಣ ಉದ್ದವನಿಗೆ ಸೂಚಿಸಿದನಂತೆ.

ಭಗವಂತನ ಆದೇಶದಂತೆ ದ್ವಾರಕೆಗೆ ಹೊರಟ ಬೃಹಸ್ಪತಿಗಳು ತಮ್ಮ ಶಿಷ್ಯ ವಾಯುದೇವನನ್ನೂ ಜೊತೆಯಲ್ಲಿ ಕರೆದುಕೊಂಡು ಹೋದರಂತೆ. ಪ್ರಳಯ ಕಾಲದಲ್ಲಿ ದ್ವಾರಕೆ ಮುಳುಗಿದರೂ  ನೀರಿನಲ್ಲಿ ತೇಲುತ್ತಿದ್ದ ಈ ವಿಗ್ರಹವನ್ನು ತೆಗೆದುಕೊಂಡು ಬರುವಂತೆ ವಾಯುದೇವನಿಗೆ ಬೃಹಸ್ಪತಿ ತಿಳಿಸಿದರಂತೆ.  ವಾಯುದೇವ ಆ ಅಮೂಲ್ಯ ವಿಗ್ರಹವನ್ನು ತನ್ನ ತಲೆಯ ಮೇಲಿಟ್ಟುಕೊಂಡು ಬಂದು, ಇದನ್ನು ಎಲ್ಲಿ ಪ್ರತಿಷ್ಠಾಪಿಸಲಿ ಎಂದು ಬೃಹಸ್ಪತಿಗಳನ್ನು ಕೇಳಿದನಂತೆ. ಆಗ ಸುರಗುರು ವಾಯು ದೇವನನ್ನು ಕರೆದುಕೊಂಡು ಬಂದು, ಕೇರಳದ ಈಗಿನ ಗುರುವಾಯೂರಿನಲ್ಲಿ ಪ್ರತಿಷ್ಠಾಪಿಸಿದರಂತೆ. ಗುರು ಮತ್ತು ವಾಯು ಇಬ್ಬರೂ ಸೇರಿ ಕೃಷ್ಣನ ಪ್ರತಿಷ್ಠಾಪಿಸಿದ ಊರು ಗುರುವಾಯೂರಾಯಿತು ಎಂದು ಹೇಳಲಾಗುತ್ತದೆ. 

ಬೃಹಸ್ಪತಿಗಳು ವಾಯುದೇವರೂ ಪ್ರತಿಷ್ಠಾಪಿಸಿದ ಕೃಷ್ಣ ವಿಗ್ರಹವಿದ್ದ ಜಾಗದಲ್ಲಿ ಗುರುವಾಯೂರಪ್ಪನ ದೇವಸ್ಥಾನ ನಿರ್ಮಿಸಲಾಗಿತ್ತಂತೆ. ಈಗ ಈ ದೇವಾಲಯ ಜೀರ್ಣೋದ್ಧಾರಗೊಂಡಿದ್ದು, ಕೇರಳದ ದೇವಾಲಯ ವಾಸ್ತುವನ್ನು ಒಳಗೊಂಡಿದೆ. ಹೆಂಚಿನ ಛಾವಣಿಯ ಈ ದೇವಾಲಯ ವಿಶಾಲವಾಗಿದ್ದು, ಭಕ್ತರ ಅನುಕೂಲಕ್ಕಾಗಿ ಸಾಕಷ್ಟು ವ್ಯವಸ್ಥೆ ಮಾಡಲಾಗಿದೆ. ಗದ್ದಲ ಗೌಜಿಲ್ಲದೆ ಎಲ್ಲರೂ ದೇವರ ದರ್ಶನ ಮಾಡಲು ಸರತಿ ಸಾಲು ನಿರ್ಮಿಸಲಾಗಿದೆ.

ಗುರುವಾಯೂರ್ ಅಪ್ಪನ್, guruvaryurappa, ಗುರುವಾಯೂರು, ಕೇರಳ, ವಾಯ್ ನಾಡ್, ಸೇಲಂ, ತ್ರಿಸೂರ್, Guruvayur temple, srikrishna, vayu, bruhaspati, temples of India,ದೇವಾಲಯದ ಪ್ರಾಕಾರ ವಿಶಾಲವಾಗಿದ್ದು, ಪ್ರದಕ್ಷಿಣ ಪಥವೂ ಇದೆ. ನಿತ್ಯ ಇಲ್ಲಿ ಆನೆಗಳ ಮೇಲೆ ದೇವರ ಮೆರವಣಿಗೆ ನಡೆಯುತ್ತದೆ. ದೇವಾಲಯದಲ್ಲಿ ಸುಮಾರು 40 ಆನೆಗಳಿದ್ದು, ಪ್ರತಿ ವರ್ಷ ದೇವಾಲಯದಲ್ಲಿ ನಡೆಯುವ ಉತ್ಸವದಲ್ಲಿ ಒಂದು ಆನೆ ಶ್ರೀಕೃಷ್ಣನ ಮೂರ್ತಿಯನ್ನು ಹೊತ್ತು ಸಾಗುತ್ತದೆ. ಯಾವ ಆನೆಗೆ ಶ್ರೀಕೃಷ್ಣ ಮೂರ್ತಿಯನ್ನು ಹೊರುವ ಯೋಗ ದೊರಕುತ್ತದೆ ಎಂಬುದನ್ನು ಆನೆಗಳ ಓಟದ ಸ್ಪರ್ಧೆಯ ಮೂಲಕ ನಿರ್ಧರಿಸಲಾಗುತ್ತದೆ. ಗೆದ್ದ ಆನೆ ಕೃಷ್ಣ ಮೂರ್ತಿಯನ್ನು ಉತ್ಸವದಲ್ಲಿ ಹೊರುತ್ತದೆ.

ನ್ನು ಇಲ್ಲಿರುವ ಗರ್ಭಗೃಹದಲ್ಲಿ ಸುಂದರ ಸ್ಪಟಿಕ ಶಿಲೆಯ ಕೃಷ್ಣ  ವಿಗ್ರಹವಿದ್ದು, ಶಂಖ, ಚಕ್ರ ಗದಾ ಪದ್ಮಧಾರಿಯಾದ ಕೃಷ್ಣ ಸಾಕ್ಷಾತ್ ಪ್ರತ್ಯಕ್ಷನಾದಂತೆ ಭಾಸವಾಗುತ್ತದೆ.

ಹದಿನಾರನೆಯ ಶತಮಾನದಲ್ಲಿ ಈ ದೇವರ ಸ್ತೋತ್ರರೂಪವಾದ ನಾರಾಯಣೀಯಂ ಎಂಬ ಗೃಂಥ ಈ ಪ್ರಾಂತ್ಯದಲ್ಲಿ ಪ್ರಸಿದ್ಧಿ ಪಡೆಯಿತು. ಇಲ್ಲಿಯ ಪೂಜೆ ಇತರ ಪೂಜೆಯಂತಲ್ಲದೆ ನಿಷ್ಕಲ ಬ್ರಹ್ಮಪೂಜೆಯಾಗಿದೆ. ಭಗವಾನ್ ಶಂಕರಾಚಾರ್ಯರು ಕೆಲಕಾಲ ಇಲ್ಲಿದ್ದು ಇಲ್ಲಿನ ಪೂಜಾ ಪದ್ಧತಿಯಲ್ಲಿ ಸುಧಾರಣೆಗಳನ್ನು ಮಾಡಿದರೆಂದೂ ಪ್ರತೀತಿ ಇದೆ. ಪೂಂತಾನಂ, ಮೇಲಪುಂತೂರ್, ಬಿಲ್ವಮಂಗಲಂ ಮತ್ತು ಮಾನವೇದನ್ ಎಂಬ ಸಂತರು ಇಲ್ಲಿದ್ದರೆಂದು ತಿಳಿದುಬರುತ್ತದೆ.

ದ್ವಾಪರ ಯುಗದಲ್ಲಿ ಶ್ರೀಕೃಷ್ಣ ಪರಮಾತ್ಮ ಸುಮಾರು 125 ವರ್ಷಗಳ ಕಾಲ  ತನ್ನ ಲೀಲಾ ವಿನೋದಗಳನ್ನು ಜಗತ್ತಿಗೆ ತೋರಿಸಿ, ಶಿಷ್ಟರಕ್ಷಣೆ ಮಾಡಿ, ದೃಷ್ಟ ಸಂಹಾರ ಮಾಡಿದ ತರುವಾಯ ಪ್ರಳಯಾನಂತರ ಶಿಲಾರೂಪ ಪಡೆದು, ಗುರುವಾಯೂರಿನಲ್ಲಿ ನೆಲೆಸಿ ಬೇಡಿ ಬರುವ ಭಕ್ತರ ಸಂಕಷ್ಟ ಹಾಗೂ ರೋಗರುಜಿನಗಳನ್ನು ದೂರ ಮಾಡುತ್ತಿದ್ದಾನೆ ಎಂಬುದು ಭಕ್ತರ ನಂಬಿಕೆ.

ಬೆಂಗಳೂರಿನಿಂದ ನಂಜನಗೂಡು, ವೈನಾಡು ಮಾರ್ಗವಾಗಿ ಗುರುವಾಯೂರಿಗೆ ಹೋಗಬಹುದು ಇಲ್ಲವೆ ಸೇಲಂ - ತ್ರಿಶೂರ್ ಮಾರ್ಗವಾಗಿಯೂ ಹೋಗಬಹುದು. ವೈನಾಡು ಮೂಲಕ ಸಾಗುವ ಕಾಡು ಹಾದಿ ಅತ್ಯಂತ ರಮಣೀಯವಾಗಿದೆ. ಚಲಿಸುವ ಹಾವಿನಂತಿರುವ ಮಾರ್ಗಗಳಲ್ಲಿ ವಾಹನದಲ್ಲಿ ಸಾಗುವುದೇ ಒಂದು ಅದ್ಭುತ ಅನುಭವ. ಈ ಕಾನನ ಮಾರ್ಗದಲ್ಲಿ ಸಾಕಷ್ಟು ವನ್ಯಮೃಗಗಳಿದ್ದು, ಕೆಲವು ಬಾರಿ ಜಿಂಕೆ, ಕರಡಿ, ಚಿರತೆ, ಹುಲಿಯ ದರ್ಶನವೂ ಆಗುತ್ತದೆ.

ಮುಖಪುಟ; /ನಮ್ಮದೇವಾಲಯಗಳು