ಪ್ರವೇಶದ್ವಾರದ ಎಡ ಬಲಗಳಲ್ಲಿ ಇರುವ ಗೂಡುಗಳಲ್ಲಿ ಗಣಪತಿ ಹಾಗೂ ಸುಬ್ರಹ್ಮಣ್ಯನ ಮೂರ್ತಿಗಳಿವೆ. ದೇವಾಲಯದ ಒಳ ಪ್ರಾಕಾರದಲ್ಲಿರುವ ಗೋಪುರದ ಮೇಲಿನ ಗೂಡುಗಳಲ್ಲಿ ಗಣಪತಿ, ಸುಬ್ರಹ್ಮಣ್ಯ, ಶಿವಪಾರ್ವತಿ, ನಂದಿಯ ಗಾರೆಯ ಶಿಲ್ಪಗಳಿವೆ. 

ಇಲ್ಲಿ ಶ್ರೀಶೈಲ ಮಲ್ಲಿಕಾರ್ಜುನನೇ ನೆಲೆಸಿದ್ದಾನೆ ಎಂಬುದು ಪುರಜನರ ನಂಬಿಕೆ. ಪ್ರಧಾನಗರ್ಭಗೃಹದಲ್ಲಿ ಗೋಸಲ ಶ್ರೀ ಚನ್ನಬಸವೇಶ್ವರ ಲಿಂಗವಿದೆ. ಗರ್ಭಗೃಹದ ಬಾಗಿಲವಾಡಗಳಿಗೆ ಹಾಗೂ ಮುಂದಿರುವ ನಂದಿಗೆ ಬೆಳ್ಳಿಯ ಕವಚಗಳನ್ನು ಮಾಡಿಸಲಾಗಿದೆ. ಸುವರ್ಣ ಮುಖವಾಡದಲ್ಲಿ ಶಿವಲಿಂಗದ ಸೌಂದರ್ಯ ನೂರ್ಮಡಿಗೊಳ್ಳುತ್ತದೆ.

ದೇವಾಲಯದ ಮೇಲಿನ ಗೋಪುರಗಳಲ್ಲಿ ಶಿವಪುರಾಣದ ಹಲವು ಶಿಲ್ಪಗಳಿವೆ. ಪಕ್ಕದಲ್ಲಿಯೇ ಇರುವ ಮತ್ತೊಂದು ಗುಡಿಯಲ್ಲಿ ಗೋಸಲ ಪರಂಪರೆಯ ಶೂನ್ಯಸಿಂಹಾಸನಾಧೀಶ್ವರರು ಇಲ್ಲಿದ್ದರೆಂದು ಪ್ರತೀತಿ. ಮುಕ್ಕಣ್ಣನ ಗುಡಿಯಲ್ಲಿ ತ್ರಿವಳಿ ತೆಂಗಿನಮರ ಇರುವುದು ವಿಶೇಷ.

ಗುಬ್ಬಿಯಲ್ಲಿ ಹಲವು ದೇಗುಲಗಳಿದ್ದು, ಇವುಗಳ ಪೈಕಿ  ಗದ್ದೆ ಮಲ್ಲೇಶ್ವರನ ದೇವಸ್ಥಾನ ಅತ್ಯಂತ ಪ್ರಾಚೀನವಾದ್ದು. ಇದು ಮೊದಲು ಊರ ಹೊರಗಿನ ಗದ್ದೆಯಲ್ಲಿದ್ದ ಕಾರಣ ಇದಕ್ಕೆ ಗದ್ದೆ ಮಲ್ಲೇಶ್ವರ ಎಂದೇ ಹೆಸರು ಬಂದಿದೆ. ದೇವಾಲಯದ ನವರಂಗದಲ್ಲಿ ದಕ್ಷಿಣಾಮೂರ್ತಿ, ಪಾರ್ವತಿ ಮತ್ತು ವೀರಭದ್ರ ಮೂರ್ತಿಗಳಿವೆ. ಊರಿನಲ್ಲಿ ಜನಾರ್ದನ ಮತ್ತು ಬ್ಯಾಟರಾಯಸ್ವಾಮಿ ದೇವಾಲಯಗಳೂ ಇವೆ. ಸನಿಹದಲ್ಲೇ ಶ್ರೀ ಚಂದ್ರಶೇಖರ ಪುರದ ಚಿದಂಬರಾಶ್ರಮದಲ್ಲಿ ದತ್ತಾತ್ರೇಯ ಮಂದಿರವೂ ಗುರುಕುಲವೂ ಇವೆ

ಸಂಪರ್ಕ: ನಿರ್ದೇಶಕರು, ಪ್ರವಾಸೋದ್ಯಮ ಇಲಾಖೆ, ಖನಿಜ ಭವನ, ರೇಸ್‌ಕೋರ್ಸ್ ರಸ್ತೆ, ಬೆಂಗಳೂರು. ದೂರವಾಣಿ :080-22352901 /22352909 /22352903 Email : kstdc@vsnl.innin

ಮುಖಪುಟ /ನಮ್ಮದೇವಾಲಯಗಳು