*ಟಿ.ಎಂ. ಸತೀಶ್

ಶಿಲ್ಪಕಲೆಗಳ ತವರು, ದೇವಾಲಯಗಳ ಬೀಡು ಹಾಸನಜಿಲ್ಲೆಯ ಪ್ರಮುಖ ತಾಲೂಕು ಕೇಂದ್ರ ಚನ್ನರಾಯಪಟ್ಟಣ. ಚನ್ನರಾಯಪಟ್ಟಣದಲ್ಲಿ ಹಲವಾರು ದೇವಾಲಯಗಳಿವೆ. ಈ ಪೈಕಿ ಕೋಟೆಯ ಚಂದ್ರಮೌಳೇಶ್ವರ ದೇವಾಲಯ ಪ್ರಮುಖವಾದದ್ದು.

ಈ ದೇವಾಲಯದಲ್ಲಿ ಶಿವನಿಗೆ ಮೂರ್ತಿಪೂಜೆ ನಡೆಯುವುದು ವಿಶೇಷ. ಪುರಾಣ ಕಥೆಗಳ ರೀತ್ಯ ಭೃಗು ಮಹರ್ಷಿಗಳ ಶಾಪದ ಫಲವಾಗಿ ಬ್ರಹ್ಮದೇವರಿಗೆ ಭೂಮಿಯಲ್ಲಿ ಪೂಜೆಯಿಲ್ಲ. ಶಿವನನ್ನು ಲಿಂಗರೂಪದಲ್ಲಿ ಮಾತ್ರವೇ ಪೂಜಿಸುತ್ತಾರೆ. ಅಂದರೆ ಶಿವನಿಗೆ ಮೂರ್ತಿಪೂಜೆ ನಿಷಿದ್ಧ. ಆದರೆ, ಚನ್ನರಾಯಪಟ್ಟಣದ ಕೋಟೆಯಲ್ಲಿರುವ ಈ ಪುರಾತನ ದೇವಾಲಯದಲ್ಲಿ ನಂದಿಯಿರುವ ಪೀಠದ ಮೇಲೆ ನಿಂತಿರುವ ಸುಂದರ ಶಿವನ ವಿಗ್ರಹವಿದೆ.

ಆರೂವರೆ ಅಡಿ ಎತ್ತರವಿರುವ ಸಮ ಹಾಗೂ ಕ್ರಮಬದ್ಧವಾಗಿರುವ ಈ ಮೂರ್ತಿ ಅತ್ಯಂತ ಸುಂದರವಾಗಿದೆ. ಒಂದು ಕೈಯಲ್ಲಿ ಮೃಗ ಮತ್ತೊಂದರಲ್ಲಿ ಪರಶು ಹಿಡಿದ ಶಿವ ಅಭಯ ಮತ್ತು ವರದ ಮುದ್ರೆಯಲ್ಲಿದ್ದಾನೆ. ಮಂದಸ್ಮಿತವಾದ ಸುಂದರ ವದನ ಎಲ್ಲರನ್ನೂ ಆಕರ್ಷಿಸುತ್ತದೆ. ಶಿವನಿಗೆ ವಸ್ತ್ರಾಭರಣಗಳನ್ನು ಶಿಲೆಯಲ್ಲೇ ತೊಡಿಸಿರುವ ಶಿಲ್ಪಿಯ ಕಲಾ ಚಾತುರ್ಯ ಎಲ್ಲರನ್ನೂ ನಿಬ್ಬೆರಗುಗೊಳಿಸುತ್ತದೆ.

ಚಂದ್ರಶೇಖರ ಸ್ವಾಮಿಗೆ ಪ್ರತಿ ವರ್ಷ ಮಾಘ ಶುದ್ಧ ಪೌರ್ಣಿಮೆಯಲ್ಲಿ ಅನೇಕ ಉತ್ಸವಾದಿಗಳು ನಡೆಯುತ್ತವೆ. ದೊಡ್ಡ ಬಸವಣ್ಣನ ಗುಡಿ ಎಂದೂ ಖ್ಯಾತವಾದ ಈ ದೇವಾಲಯದಲ್ಲಿ ಸುಂದರವಾದ ಬಸವಣ್ಣನ ಮೂರ್ತಿಯಿದೆ. ಪ್ರಾಕಾರದಲ್ಲಿರುವ ಮತ್ತೊಂದು ಗರ್ಭಗೃಹದಲ್ಲಿ ಗೌರಮ್ಮನ ವಿಗ್ರಹವಿದೆ. ಕಮಲ ಹಿಡಿದ ದೇವಿಯ ಸುಂದರ ಕೃಷ್ಣ ಶಿಲೆಯ ವಿಗ್ರಹ ಮನಮೋಹಕವಾಗಿದೆ. ಹಿಂದಿನ ಪ್ರಭಾವಳಿಯಲ್ಲಿ ಹಾಗೂ ಕಿರೀಟದಲ್ಲಿ ಸೂಕ್ಷ್ಮ ಕೆತ್ತನೆ ಇದೆ.

ದೇವಾಲಯದಲ್ಲಿ ಸುಂದರವಾದ ಅಮೃತಶಿಲೆಯ ಶಿವಲಿಂಗವಿದೆ. ನಿತ್ಯವೂ ದೇವರಿಗೆ ಪೂಜೆ, ಪುನಸ್ಕಾರಗಳು ಶೈವಾಗಮದ ರೀತ್ಯ ನಡೆಯುತ್ತದೆ.

ಕಾರ್ತೀಕ ಮಾಸದ ಎಲ್ಲ ಸೋಮವಾರಗಳಂದು, ನವರಾತ್ರಿಯ ಹತ್ತೂದಿನ ಹಾಗೂ ಶಿವರಾತ್ರಿಯಂದು ಇಲ್ಲಿ ದೇವರಿಗೆ ವಿಶೇಷ ಅಲಂಕಾರ, ಅಲಂಕಾರಗಳು ನಡೆಯುತ್ತವೆ. ಸುತ್ತಮುತ್ತಲ ಗ್ರಾಮಗಳಿಂದ ಬರುವ ಭಕ್ತರು ನಿತ್ಯ ಇಲ್ಲಿಗೆ ಆಗಮಿಸಿ ಶ್ರೀ ಚಂದ್ರಶೇಖರ ಸ್ವಾಮಿಯ ದರ್ಶನ ಪಡೆಯುತ್ತಾರೆ. ಹೀಗಾಗಿ ಇಲ್ಲಿ ನಿತ್ಯ ಜನಜಾತ್ರೆಯೇ ನಡೆಯುತ್ತದೆ. ಹೆಚ್ಚಿನ ವಿವರಗಳಿಗೆ ದೂರವಾಣಿ ಸಂಖ್ಯೆ 9845611426 ಸಂಪರ್ಕಿಸಬಹುದು.

ಸಂಪರ್ಕ: ಉಪ ನಿರ್ದೇಶಕರು ಮತ್ತು ಅಧ್ಯಕ್ಷರು, ಜಿಲ್ಲಾ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿ, ಹಾಸನ, ದೂರವಾಣಿ 08172-267345. ಅಥವಾ ಸಹಾಯಕ ನಿರ್ದೇಶಕರು, ಪ್ರದಾಶಿಕ ಪ್ರವಾಸೋದ್ಯಮ ಅಧಿಕಾರಿಗಳ ಕಾರ್ಯಾಲಯ, ಹಾಸನ. 08172-268862.

ಮುಖಪುಟ /ನಮ್ಮದೇವಾಲಯಗಳು