ಮುಖಪುಟ
/ನಮ್ಮದೇವಾಲಯಗಳು
ಬ್ಯಾಟರಾಯನಪುರದ ಕೋದಂಡರಾಮಸ್ವಾಮಿ
*ಟಿ.ಎಂ.ಸತೀಶ್
ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹೋಗುವ ಬೆಂಗಳೂರು –
ಬಳ್ಳಾರಿ ರಸ್ತೆಯಲ್ಲಿ ಹೆಬ್ಬಾಳ ದಾಟಿದೊಡನೆ ಹೆದ್ದಾರಿಯ ಬದಿಯಲ್ಲೇ ಇರುವ ಈ
ದೇವಾಲಯವನ್ನು 1948ರಲ್ಲಿ ನಿರ್ಮಿಸಲಾಯಿತು. ದೇವಾಲಯ ಪ್ರತಿಷ್ಠಾಪನೆಯ
ಸಂದರ್ಭದಲ್ಲಿ ಮೈಸೂರು ಮಹಾರಾಜರಾದ ಶ್ರೀಜಯಚಾಮರಾಜೇಂದ್ರ ಒಡೆಯರು ಹಾಜರಿದ್ದು
ಸಾಕ್ಷೀಕರಿಸಿದರು ಎಂದು ದೇವಾಲಯದ ಪ್ರಾಕಾರದಲ್ಲಿರುವ ಶಾಸನ ಸಾರುತ್ತದೆ.
ದೇವಾಲಯದಲ್ಲಿ ಮೂರು ಗರ್ಭಗುಡಿಗಳಿದ್ದು ಮಧ್ಯದಲ್ಲಿರುವ ಪ್ರಧಾನ ಗರ್ಭಗೃಹದಲ್ಲಿ
ಸೀತಾ ರಾಮ ಸಹಿತನಾಗಿ ಬಿಲ್ಲು ಹಿಡಿದ ಶ್ರೀಕೋದಂಡರಾಮದೇವರ ಸುಂದರ ವಿಗ್ರಹವಿದೆ.
ಪೀಠದ ತಳಭಾಗದಲ್ಲಿ ಭಕ್ತಿಯಿಂದ ಕೈಮುಗಿದು ಕುಳಿತ ಹನುಮಂತನ ವಿಗ್ರಹವಿದೆ.
ಕೋದಂಡರಾಮಸ್ವಾಮಿಯ ಎದುರು ಗರುಡಗಂಬವಿದೆ. ವಿಶಾಲವಾದ ದೇವಾಲಯದಲ್ಲಿ ಮುಖಮಂಟಪ,
ಪ್ರಾಕಾರವಿದೆ. ದೇವಾಲಯದ ಸಾಮಾನ್ಯ ಕಲ್ಲಿನ ನಿರ್ಮಾಣವಾಗಿದ್ದು ಭಿತ್ತಿಗಳಲ್ಲಿ
ಯಾವುದೇ ಶಿಲ್ಪಕಲಾಲಂಕರಣಗಳಿಲ್ಲ. ಈ ದೇವಾಲಯವನ್ನು ಸ್ಥಳೀಯರಾದ ಆಂದಪ್ಪನವರು
ನಿರ್ಮಿಸಿದರೆಂದು ಸ್ಥಾನಿಕಂ ಪುರೋಹಿತರು ತಿಳಿಸುತ್ತಾರೆ. ನಂತರದ ದಿನಗಳಲ್ಲಿ ಅವರ
ವಂಶಸ್ಥರು ಈ ದೇವಾಲಯವನ್ನು ಅಭಿವೃದ್ಧಿ ಪಡಿಸಿದ್ದಾರೆ. ಹನುಮದ್ ಸಮೇತನಾಗಿ ಇಲ್ಲಿ
ನೆಲೆಸಿರುವ ಕೋದಂಡರಾಮಸ್ವಾಮಿ ಭಕ್ತರ ಇಷ್ಟಾರ್ಥವನ್ನು ಈಡೇರಿಸುತ್ತಾನೆ ಎಂಬುದು
ಭಕ್ತರ ನಂಬಿಕೆ. ಶ್ರಾವಣ ಶನಿವಾರ ಇಲ್ಲಿ ವಿಶೇಷ ಪೂಜೆ ನಡೆಯುತ್ತದೆ.
ಶ್ರೀರಾಮನವಮಿಯ ಸಂದರ್ಭದಲ್ಲಂತೂ ಗರುಡೋತ್ಸವ, ಶಯನೋತ್ಸವ, ಕಲ್ಯಾಣೋತ್ಸವ,
ಶೇಷವಾಹನೋತ್ಸವ, ಗರುಡೋತ್ಸವವೇ ಮೊದಲಾದ ಹಲವು ಉತ್ಸವಗಳು ವಿಜೃಂಭಣೆಯಿಂದ
ನಡೆಯುತ್ತವೆ. ಬೆಂಗಳೂರು ನಗರದ ಕೆಂಪೇಗೌಡ ಬಸ್ ನಿಲ್ದಾಣ, ಕೆಂಗೇರಿ, ಸಿಟಿ
ಮಾರುಕಟ್ಟೆ, ಯಲಹಂಕದಿಂದ ಇಲ್ಲಿಗೆ ನೇರ ಬಸ್ ಸೌಲಭ್ಯವಿದೆ. 
ಬಳ್ಳಾರಿಯಲ್ಲಿರುವ
ಬ್ಯಾಟರಾಯನಪುರ ಯಲಹಂಕ ಬಳಿ ಇರುವ ಹಳೆಯ ಊರುಗಳಲ್ಲಿ ಒಂದು. ಕೆಲವೇ ವರ್ಷಗಳ ಹಿಂದೆ
ಬೆಂಗಳೂರು ಹೊರವಲಯವಾಗಿದ್ದ ಬ್ಯಾಟರಾಯನಪುರ ಇಂದು ಬೃಹತ್ ಬೆಂಗಳೂರು ಮಹಾನಗರದಲ್ಲಿ
ಲೀನವಾಗಿದೆ. ಇಲ್ಲಿರುವ ಶ್ರೀಕೋದಂಡರಾಮಸ್ವಾಮಿ ದೇವಾಲಯ ಈ ಊರಿನ ಪುರಾತನ ದೇವಾಲಯ.
ಶ್ರೀರಾಮ,
ಸೀತಾ ಲಕ್ಷ್ಮಣರು ಹಾಗೂ ಋಷಿ ಮುನಿಗಳು ಹಾಗೂ ಯಕ್ಷ ಕಿನ್ನರರುಗಳನ್ನು
ಒಳಗೊಂಡ
ದ್ರಾವಿಡ ಶೈಲಿಯ ರಾಜಗೋಪುರ, ಶಂಖ, ಚಕ್ರದ ಸುಂದರ ಚಿತ್ರಗಳ ಮಧ್ಯ ಇರುವ
ಮಹಾದ್ವಾರವನ್ನು ಒಳಗೊಂಡ ಈ ದೇವಾಲಯ ಕಲ್ಲು ಕಟ್ಟಡವಾಗಿದ್ದು, ಮೇಲ್ಭಾಗದಲ್ಲಿ
ಗಾರೆಯಿಂದ ನಿರ್ಮಿಸಿದ ಗೋಪುರವಿದೆ. ಈ ಗೋಪುರ ಗೂಡುಗಳಲ್ಲಿ ಹನುಮದ್ ಸಮೇತ
ಸೀತಾರಾಮಲಕ್ಷ್ಮಣರ ಶಿಲ್ಪಗಳಿವೆ.
ಗರ್ಭಗುಡಿಯ ದ್ವಾರದ ಎಡ ಮತ್ತು ಬಲ ಭಾಗದ ಗೂಡುಗಳಲ್ಲಿ ಜಯವಿಜಯರ ಒಂದೂವರೆ ಅಡಿ
ಎತ್ತರದ ಮೂರ್ತಿಗಳಿವೆ. ಪ್ರಧಾನಗರ್ಭಗೃಹದ ಬಲಭಾಗದಲ್ಲಿ ಗಣಪನ ಮೂರ್ತಿಯಿದ್ದರೆ,
ಎಡಭಾಗದಲ್ಲಿ ವೇಲಾಯುಧ ಹಿಡಿದ ಸುಬ್ರಹ್ಮಣ್ಯನ ಮೂರ್ತಿಯನ್ನು
ಪ್ರತಿಷ್ಠಾಪಿಸಲಾಗಿದೆ.
ಶ್ರೀಕೋದಂಡರಾಮಸ್ವಾಮಿ ದೇವಾಲಯ ಟ್ರಸ್ಟ್ ಆಡಳಿತಕ್ಕೊಳಪಟ್ಟ ಈ ದೇವಾಲಯದಲ್ಲಿ
ನಿತ್ಯವೂ ಪೂಜೆ ಪುನಸ್ಕಾರಗಳು ವೈಭವದಿಂದ ನಡೆಯುತ್ತದೆ. ಪ್ರತಿ ತಿಂಗಳ
ಪೌರ್ಣಿಮೆಯಂದು ದೇವಾಲಯದಲ್ಲಿ ಶ್ರೀಸತ್ಯನಾರಾಯಣ ಪೂಜೆ ಹಾಗೂ ಚೌತಿಯಂದು ಸಂಕಷ್ಟಹರ
ಗಣಪತಿ ಪೂಜೆ ನೆರವೇರುತ್ತದೆ.